0 34

Урысые Федерацием и Правительствэ проектым къыдыригъэштагъ

Майкоп, 19 сентября - АиФ-Адыгея.

Федеральнэ бюджетым ипроектэу 2018 — 2020-рэ илъэсхэр къызэлъызыубытырэм Урысые Федерацием и Правительствэ къыдыригъэштагъ.

А проектым къызэрэдилъытэрэмкIэ, Мыекъопэ районым ипсэупIэхэмрэ къалэу Мыекъуапэрэ псыIыгъыпIэрэ псырыкIуапIэрэ ящэлIэгъэнхэм мылъкоу 2018-рэ илъэсым пэIухьащтыр къыхэгъэкIыгъэн фае.

Федеральнэ законым ипроект Къэралыгъо Думэм къыхэлъхьэгъэным ехьылIэгъэ унашъор аштэгъах.

Мы илъэсым мэкъуогъум Адыгеим ипащэхэм республикэм ыцIэкIэ депутатхэр ягъусэхэу псыIыгъыпIэмрэ псырыкIуапIэмрэ яшIын мылъкоу пэIугъэхьэгъэн фаем Къэралыгъо Думэм щытегущыIэгъагъэх. Ащыгъум 2017-рэ илъэсымкIэ федеральнэ бюджетым гъэтэрэзыжьынэу фашIыхэрэм щахэплъэгъагъэх. 2018 — 2020-рэ илъэсхэмкIэ федеральнэ бюджетым ипроект зэхагъэуцо зэхъум, бюджетымкIэ комитетым правительствэм игъоу филъэгъугъэм депутатхэм къыдырагъэштэгъагъ, къэзытхырэр Адыгэ Республикэм и ЛIышъхьэ ипресс-къулыкъу.

«Адыгэ Республикэм ипащэхэр тигъусэхэу Урысые Федерацием финансхэмкIэ и Министерствэрэ и Правительствэрэ агурыдгъэIогъагъ республикэмкIэ мэхьанэшхо зиIэ проектым федеральнэ лъэгапIэм къикIэу IэпыIэгъу етыгъэным мэхьанэшхо зэриIэр. Къалэу Мыекъуапэ щыпсэухэрэ цIыфхэр зэшъощтхэ псы къабзэр IэкIэгъэхьэгъэнымкIэ ыкIи къушъхьэлъэ псыкъэкIуапIэхэм къакIичэу е псыхъоу Цыцэ ипс шIоркъ хъумэ Iофыгъоу къэуцухэрэр зэшIохыгъэнхэмкIэ ащ ишIогъэшхо къэкIощт», — къыхигъэщыгъ Къэралыгъо Думэм бюджетымкIэ ыкIи хэбзэIахьхэмкIэ и Комитет хэтэу, Адыгеим ыцIэкIэ Къэралыгъо Думэм идепутатэу Владислав Резник.

Шъугу къэтэгъэкIыжьы: республикэм и ЛIышъхьэу КъумпIыл Мурат Урысые Федерацием и Правительствэ и Тхьаматэ игуадзэу Дмитрий Козак зыIокIэм, Урысые Федерацием и Правительствэ а Iофыр къыщиIэтыгъагъ.

Оставить комментарий
Вход
Комментарии (0)

  1. Пока никто не оставил здесь свой комментарий. Станьте первым.


Все комментарии Оставить свой комментарий
Самое интересное в регионах