0 39

АР-м и ЛIышъхь: «Кемерово къыщыхъугъэ тхьамыкIагъом фэдэ къэхъужь хъущтэп»

Майкоп, 28 марта - АиФ-Адыгея.

Адыгэ Республикэм и ЛIышъхьэу КъумпIыл Муратрэ Урысые Федерацием и Президент исоветникэу, Урысые Федерацием и Президент дэжь граждан обществэм ихэхъоныгъэкIэ ыкIи цIыфым ифитыныгъэхэмкIэ Советэу щызэхэщагъэм итхьаматэу Михаил Федотовымрэ Кемерово щыпсэухэрэм ыкIи машIом хэкIодэгъэ цIыфхэм яунагъохэм якъин зэрадагощырэр къаIуагъ.

МашIор зыпкъ къикIыгъэр лъэшэу анаIэ тетэу зэхафынымкIэ, агъэунэфынымкIэ Президентэу Владимир Путиным пшъэрылъэу къыгъэуцугъэм Михаил Федотовымрэ КъумпIыл Муратрэ дырагъэштагъ.

«Лажьэ зиIэхэр къызэрэхагъэщыщтхэм ыкIи зэрагъэпщынэщтхэм сехъырэхъышэрэп. Владимир Путиным къызэриIуагъэу, анахь мэхьанэ зиIэр лъэшэу анаIэ тетэу зэхэфын IофшIэнхэр агъэцэкIэнхэр, лажьэ зиIэхэр къагъотынхэр ары, пшъэдэкIыжьэу ахэм ахьыщтыр хьыкумым къыгъэнэфэщт. Ау а тхьамыкIагъор зэкIэхэми десэ тфэхъун фае. ТапэкIэ ащ фэдэ къэмыхъужьыным пае тфэлъэкIыщтыр зэкIэ тшIэн фае», — къыхигъэщыгъ Михаил Федотовым, къэзытхырэр Адыгэ Республикэм и ЛIышъхьэ ипресс-къулыкъу.

МашIом зыкъымыштэнымкIэ Iофтхьабзэхэу Адыгеим щызэрахьэхэрэм Михаил Федотовым защигъэгъозагъ. КъумпIыл Мурат къызэрэхигъэщыгъэмкIэ, Iэпэдэлэлныгъэ мы лъэныкъомкIэ къахэмыфэным пае республикэм ищыкIагъэр зэкIэ щызэшIуахыщт. Ащ тегъэпсыхьагъэу социальнэ ыкIи сатыушIыпIэ, гъэпсэфыпIэ псэолъэ пстэуми уплъэкIун IофшIэнхэр ащызэшIуахынхэу Адыгеим иIэшъхьэтет унашъо афишIыгъ.

«Кемерово къыщыхъугъэ тхьамыкIагъор тихэгъэгу, треспубликэ щыпсэурэ цIыфхэм лъэшэу гухэкI ащыхъугъ. Ащ фэдэ къэхъужьы хъущтэп. ЗэкIэ къытэлъытыгъэр тшIэщт ащ фэдэ тхьамыкIагъо къэмыхъужьыным пае. МашIом хэкIодэгъэ цIыфхэм яунагъохэм, ягупсэхэм гухэкIышхо сщыхъоу сафэтхьаусыхэ», — къыIуагъ КъумпIыл Мурат.

Оставить комментарий
Вход
Комментарии (0)

  1. Пока никто не оставил здесь свой комментарий. Станьте первым.


Все комментарии Оставить свой комментарий
Самое интересное в регионах